Castellonen, Culla herrian jokatu da distantzia luzeko duatloien Espainiko Kopako azken proba, eta Ibai Alba Vilchez hernaniarrak bigarren egin du sailkapen nagusian, 19.701 punturekin; irabazlearengandik bi puntura.
Urteko helburua beteta, deskantsatzeko tartea iritsi da, baina ezin, entrenatu gabe geratu!
Espainiako Kopan bigarren egin duzu. Espero zenuen?
Urte hasieran nere helburua zen aurreneko 10en artean geratzea lortzea. Beraz, oso pozik nago. Maiatzean Sorian bigarren nijoan, baina, hala ere, ez nekien gainontzekoak nola iritsiko ziren bukaerara, eta 4 edo 5garren eginda ere, pozik egongo nintzen!
Proba oso gogorra izan da Cullakoa. Bizikleta egin gabe geratu zineten...
Ikaragarrizko euri jasa, hiru gradu, haizea... Elurrik ez, Castellon zelako! Oso politak ziren herria eta ibilbidea bera, dena gora eta behera, baina oso gogorra. Bizikleta ez egitea pena izan da, bai neretzat eta baita gainontzekoentzat ere.
Urteko balentria bakarra ez da hau izan. Beste hainbat probatan aurreneko postuetan ibili zara. Helburuak bete dituzu?
Baita gainditu ere! Oso oso oso ondo joan da. 16 bat karrera irabazi ditut, eta ez dakit zenbatetan iritsi naizen podiumera. Mendikoak, asfaltokoak, duatloiak.. Denetik egin dut.
Denen artean, izan al da bat bat bereziagoa?
Azken hauxe. Hau ez da herri lasterketa, eta hau lanbide dutenak ateratzen dira hemen, edo lanaldi erdian aritzen direnak, gero, entrenatu ahal izateko. Neretzako ikaragarria izan da. Oso zaila da. Zortzi orduz lorezain aritu eta denbora ateratzea... Ez dut esan nahi emaitzak bikoitza balio duenik... Baina neretzako bai! Dudarik gabe, kirol urterik onena izan da. Ez naiz profesionala, eta horrelakoei irabaztea ikaragarria da.
Erronkarik geratzen zaizu?
Orain ez. Abendua lasai hartuko dut. Hurrengo helburua berriro ere Espainiako Kopa izango da, eta martxoan hasiko da. Orain, egunero entrenatu, bai, baina lasai!
Korrika eta bizikletan ibiltzen zara. Triatloirik ez?
Hiru gauzetarako denbora ateratzea oso zaila da. Korrika egitea eta bizikleta asko gustatzen zaizkit, eta horiekin, lasterketa herrikoiak edo duatloiak egin ditzaket. Gehiago ez. Jakin behar da non daukazun muga.
Lasterketa herrikoiak ere gustuko dituzu: Behobia, Txantxilla, Sagar Lasterra... Eta San Silbestre?
Noski, aterako naiz! Aurten, gainera, berriro ere Hernaniko Atletismo Klubean nabil. Neretzako entrenamenduak dira lasterketa hauek. Behobia bezperan ere, hiru orduz bizikletan ibili nintzen.
Iazko San Silbestren Yohanes Merino gazteak irabazi zizun. Badago afizioa Hernanin!
Yohanes Merinok irabazi, eta Anartz Artolak, hirugarren. Nik goizean bizikleta egin nuen; gero, Andoaingo San Silbestre irabazi; eta azkenik, Hernanin atera. Afizio haundia dago atletismorako, bizikletarako... Duatloi eta triatloietarako denbora gehiago behar da.