Nafarroako Gobernuko Merkataritza eta Turismo Zuzendaritza Nagusiak berriro jarri du martxan CEINek kudeatutako Negozio-eredua. Landa-merkataritza programa.
Honen helburua da 2.500 biztanletik beherako herrietan dauden elikagai-dendei laguntza, aholkularitza eta prestakuntza zerbitzua ematea, negozioa eraldatu, eraberritu edo bilakatu nahi badute.
Eskaerak martxoaren 15era arte egin ahal izanen dira, egun hori barne.
Errentagarritasuna hobetzeko laguntza, gehienez, 7 dendari
Formazio eta aholkularitza programa apirilaren 1ean jarriko da martxan, eta gehienez, 7 denda lagunduko dira. Helburu nagusia izango da denden errentagarritasuna hobetzea, eta, beraz, baita dendarien bizi-kalitatea ere.
Aukeratutako dendariek CEIN enpresa publikoko teknikarien laguntza izanen dute, norberari egokitua. Hasteko, negozioaren beraren azterketa eginen da, eta horren araberako formazioa emanen da. Ondoren, proposatutako ekintzen aplikazioaren jarraipena eginen da.?Eta azkenean, emaitzen balorazioa egiten da.
Formazio eta aholkularitza programa hau apirilaren 1ean jarriko da martxan, eta zazpi denda lagunduko dira.
Izenematea, formularioa beteta
Laguntza jaso nahi duten dendariek eskaera orria edo formularioa bete eta martxoaren 15a baino lehen, edo egun horretan bidali behar dute helbide elektroniko honetara: comerciorural@cein.es.
Programan parte hartuko duten dendak zein izanen diren aukeratzeko, kontuan hartuko da negozioaren jarduera zein den, zein tokitan kokatua dagoen eta interes turistikoa duen gunea ote den, edota enpresaren konpromisoa sendoa den, negozioaren eraldaketa lortzeko.
Informazio gehiago lortu edo dudak argitzeko, CEINera, Miren Sanzengana jo daiteke, 848 426 000 telefonoan, CEINen webgunean (www.cein.es) edo www.navarra.es webgunean.